Angul News: ମଙ୍ଗଳବାର ୨୫ ତାରିଖରେ ସ୍ଥାନୀୟ ସମଗ୍ର ଶିକ୍ଷା ସମ୍ମିଳନୀ କକ୍ଷ, ଅନୁଗୋଳଠାରେ ତା ୨୪.୦୨.୨୦୨୫ ଓ ତା ୨୫.୦୨.୨୦୨୫ ରିଖ ଦୁଇଦିନ ବ୍ୟାପୀ ଜୋନାଲ ସ୍ତରୀୟ ସ୍ଵତନ୍ତ୍ର ଅଲମ୍ପିକ ଭାରତ ଓ ଏକୀକୃତ କ୍ରୀଡା ସମ୍ପର୍କିତ ଅନୁଗୋଳ, ଢେଙ୍କାନାଳ ଓ ଦେବଗଡ ଜିଲ୍ଲାର ଗୋଷ୍ଠୀ ସାଧନକର୍ମୀମାନଙ୍କ ତାଲିମ କାର୍ଯ୍ଯକ୍ରମ ଅନୁଷ୍ଠିତ ହୋଇଯାଇଛି । ଉକ୍ତ ତାଲିମ କାର୍ଯ୍ୟକ୍ରମରେ ୩୨ ଜଣ ଗୋଷ୍ଟୀ ସାଧନ କର୍ମୀ, ୧୦ ଜଣ ଭିନ୍ନକ୍ଷମ ଛାତ୍ରଛାତ୍ରୀ, ୫ ଜଣ ସାଧାରଣ ଛାତ୍ରଛାତ୍ରୀ, ଦୁଇଜଣ ଖେଳ ଶିକ୍ଷକ, ୧୫ ଜଣ ଅଭିଭାବକ ସମେତ ସମୁଦାୟ ୬୮ ଜଣ ଅଂଶଗ୍ରହଣକାରୀ ଭାଗ ନେଇଥିଲେ ।
ଉକ୍ତ କାର୍ଯ୍ୟକ୍ରମର ମୁଖ୍ୟ ଅତିଥି ଭାବରେ ଜିଲ୍ଲା ଶିକ୍ଷା ଅଧିକାରୀ-ତଥା-ଜିଲ୍ଲା ପ୍ରକଳ୍ପ ସଂଯୋଜକ ଶ୍ରୀଯୁକ୍ତ ନିରଞ୍ଜନ ସାହୁ, ସମ୍ମାନିତ ଅତିଥି ଭାବରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀମତୀ ପ୍ରତିଭା ବାରିକ, କାର୍ଯ୍ୟକ୍ରମ ସଂଯୋଜକ ଭାବରେ ଜିଲ୍ଲା ଅନ୍ତର୍ନିବେଶୀ ଶିକ୍ଷା ସଂଯୋଜକ ଶ୍ରୀଯୁକ୍ତ ବିଜୟ କୁମାର ସାହୁ, ସ୍ଵତନ୍ତ୍ର ଅଲମ୍ପିକ ଭାରତ, ଓଡିଶାର ପ୍ରତିନିଧି ଭାବରେ କ୍ରୀଡା ନିର୍ଦ୍ଦେଶିକା ତଥା ଅନ୍ତରାଷ୍ଟ୍ରୀୟ କୋଚ ସସ୍ମିତା ମହାପାତ୍ର, ସ୍ଵତନ୍ତ୍ର ଅଲମ୍ପିକ ଭାରତ, ଓଡିଶାର ରାଜ୍ୟ ପ୍ରକଳ୍ପ ସଂଯୋଜକ ତଥା ଅନ୍ତରାଷ୍ଟ୍ରୀୟ କୋଚ ଅର୍ପିତା ମହାପାତ୍ର, ରାଜ୍ୟ ସାଧନକର୍ମୀ ଶ୍ରୀଯୁକ୍ତ ତ୍ରିନାଥ ସାମଲ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ ।
କାର୍ଯ୍ୟକ୍ରମର ମୁଖ୍ୟଅତିଥି ଶ୍ରୀଯୁକ୍ତ ସାହୁ ତାଙ୍କର ଅଭିଭାଷଣ ଛଳରେ କହିଥିଲେ ଏହି କାର୍ଯ୍ଯକ୍ରମ ମାଧ୍ୟମରେ ଜିଲ୍ଲାର ସବୁ ବର୍ଗର ଭିନ୍ନକ୍ଷମ ଛାତ୍ରଛାତ୍ରୀ ସ୍ଵତନ୍ତ୍ର ଅଲମ୍ପିକ କଣ ବୁଝିବେ ଏବଂ ସ୍ଵତନ୍ତ୍ର ଅଲମ୍ପିକରେ ଖେଳିବା ନିମନ୍ତ ନିଜକୁ ପ୍ରସ୍ତୁତ କରିପାରିବେ । ଏଥିପାଇଁ ଜିଲ୍ଲା ତରଫରୁ ଯେଉଁ ଯେଉଁ ଭିତ୍ତିଭୂମି ଦରକାର ଜିଲ୍ଲା ଶିକ୍ଷା କାର୍ଯ୍ଯାଳୟ ତରଫରୁ ଯୋଗାଇ ଦିଆଯିବ ।
କାର୍ଯ୍ୟକ୍ରମର ସମ୍ମାନିତ ଅତିଥି ଶ୍ରୀମତୀ ବାରିକ ଅଂଶଗ୍ରହଣକାରୀ ପ୍ରଶିକ୍ଷାର୍ଥୀମାନଙ୍କୁ ଆହ୍ଵାନ ପୂର୍ବକ କହିଥିଲେ ଯେ “ଜିଲ୍ଲାରୁ ପ୍ରତିବର୍ଷ ଅତି କମରେ ଗୋଟିଏ ପିଲା ଅଲମ୍ପିକ ପାଇଁ ପ୍ରସ୍ତୁତ କରିବା ଲକ୍ଷ୍ୟ ନେଇ ଆଗକୁ କାର୍ଯ୍ୟ କରିବା, ଯଦ୍ଵାରା ଭିନ୍ନକ୍ଷମ ପିଲାଙ୍କ ନିମନ୍ତେ ସ୍ଵତନ୍ତ୍ର ଅଲମ୍ପିକର ଲକ୍ଷ୍ୟ ପୂରଣ ହୋଇପାରିବ”। ସ୍ଵତନ୍ତ୍ର ଅଲମ୍ପିକ ତରଫରୁ ଛାତ୍ରଛାତ୍ରୀମାନଙ୍କୁ ସ୍ଵତନ୍ତ୍ର ଅଲମ୍ପିକ ଜର୍ସି ପ୍ରଦାନ କରାଯାଇ ବୋଚି, ଏକୀକୃତ ଫୁଟବଲ, ଆଥେଲେଟିକ୍ସ, ବ୍ୟାଡ ମିଣ୍ଟନ, ୟଙ୍ଗ ଆଥେଲେଟିକ୍ସ ପ୍ରୋଗ୍ରାମ, ଫନଗେମ, ୱାର୍ମ ଅଫ କାର୍ଯ୍ୟକ୍ରମ ଆଦି ପ୍ରଦର୍ଶନ କରାଯାଇଥିଲା । କାର୍ଯ୍ୟକ୍ରମ ଶେଷରେ ସମସ୍ତ ପ୍ରଶିକ୍ଷାର୍ଥୀଙ୍କୁ ଅଂଶଗ୍ରହଣ ପ୍ରମାଣପତ୍ର ପ୍ରଦାନ କରାଯାଇଥିଲା । କାର୍ଯ୍ୟକ୍ରମ ସଂଯୋଜକ ଶ୍ରୀଯୁକ୍ତ ବିଜୟ କୁମାର ସାହୁ ଉପସ୍ଥିତ ସମସ୍ତ ପ୍ରଶିକ୍ଷାର୍ଥୀ ଓ କର୍ମକର୍ତ୍ତାଙ୍କୁ ଧନ୍ୟବାଦ ଅର୍ପଣ କରିଥିଲେ ।