ଅନୁଗୋଳ,(ସୁବ୍ରତ ପଟ୍ଟନାୟକ): ‘ଅନୁଗୋଳ ଅକ୍ଷୟ’ ୱାଟ୍ସ ଆପ୍ ଗ୍ରୁପ୍ ପକ୍ଷରୁ ସହରର ମିଶ୍ରପଡ଼ା, ହାତୀଶାଳପଡ଼ା, ହୁଲୁରିସିଂହା, ଗୁଜୁରାତିପଡ଼ା ଅଞ୍ଚଳରେ ବୁଲା ପ୍ରାଣୀମାନଙ୍କ ଲାଗି ଜଳବ୍ୟବସ୍ଥା କରାଯାଇଛି। ଉପରୋକ୍ତ ଅଞ୍ଚଳର ୧୫ଟି ସ୍ଥାନରେ ସିମେଣ୍ଟ କୁଣ୍ଡ ସ୍ଥାପନା କରାଯାଇ ନିୟମିତ ସେଥିରେ ପାଣି ଭରିବା ଲାଗି ଜଣେ ଜଣେ ବ୍ୟକ୍ତିଙ୍କୁ ଦାୟିତ୍ବ ଦିଆଯାଇଛି। ଗ୍ରୁପ୍ର ଏହି ଯୋଜନାରେ ଆଗ୍ରହ ପ୍ରକଟ କରି ନିଜ ନିଜ ଘର ସମ୍ମୁଖରେ କୁଣ୍ଡ ରଖିବା ଲାଗି ଅନେକ ଆଗ୍ରହ ପ୍ରକାଶ କରି ସେଥିରେ ନିୟମିତ ଜଳ ଭରିବାର ଦାୟିତ୍ବ ମଧ୍ୟ ନେଇଥିଲେ। ସେହିକ୍ରମରେ ଦେବାଶିଷ ପଟ୍ଟନାୟକ, ବେଣୁଧର ସାହୁ, ସରୋଜ ସାହୁ, ଶରତଚନ୍ଦ୍ର ସାହୁ, ପ୍ରଶାନ୍ତକୁମାର ଦାଶଙ୍କ ସମେତ ଅନ୍ୟମାନଙ୍କ ଘର ସମ୍ମୁଖରେ ଏହି କୁଣ୍ଡ ସ୍ଥାପନା କରାଯାଇଥିଲା। ରୌଦ୍ରତାପ ସମୟରେ ବୁଲା ପ୍ରାଣୀଙ୍କ ଲାଗି ଏହି ଜଳ ବ୍ୟବସ୍ଥା କାର୍ଯ୍ୟରେ ଲାଗିବ ବୋଲି ପ୍ରକାଶ କରାଯାଇଛି। ସୁଧିରେନ୍ଦ୍ର ପରିଜାଙ୍କ ନେତୃତ୍ବରେ ଆୟୋଜିତ କାର୍ଯ୍ୟରେ ଅଜିତକୁମାର ପଟ୍ଟନାୟକ, ରଣଜିତ ଦାଶ, ରାଜେଶ ଧଳବିଶୋୟୀ, ମନୋଜକୁମାର ପଣ୍ଡା, ସୁରେନ୍ଦ୍ର ଶତପଥୀ, ଚନ୍ଦ୍ରଶେଖର ସୁଧିରେନ୍ଦ୍ର ପରିଜା, ଆଦ୍ୟା ପଟ୍ଟନାୟକ ପ୍ରମୁଖ ସହଯୋଗ କରିଥିଲେ।