Angul News: ଅନୁଗୁଳ : ଜିନ୍ଦଲ ଷ୍ଟିଲ ଆଣ୍ଡ ପାୱାର (ଜେଏସପି) ପକ୍ଷରୁ ଅନୁଗୁଳ ପ୍ଲାଂଟ ପରିସରରେ ଦେଶପ୍ରେମର ଉତ୍ସାହ ସହିତ ତ୍ରିରଙ୍ଗା ପତାକା ଦିବସ ପାଳିତ ହୋଇଛି । ଫ୍ଲାଗ୍ ଫାଉଣ୍ଡେସନ ଅଫ ଇଣ୍ଡିଆର ଅଧ୍ୟକ୍ଷ ତଥା କୁରୁକ୍ଷେତ୍ର ଲୋକସଭା ଆସନରୁ ୩ଥର ସାଂସଦ ନିର୍ବାଚିତ, ଶ୍ରୀ ନବୀନ ଜିନ୍ଦଲଙ୍କ ନେତୃତ୍ୱରେ ହାସଲ ହୋଇଥିବା ଐତିହାସିକ ବିଜୟର ୨୧ ବର୍ଷ ପୂର୍ତ୍ତି ଅବସରରେ ଏହି ଦିବସ ପାଳିତ ହୋଇଛି ।
ଜାତୀୟ ପତାକାକାକୁ ଗର୍ବ ଓ ସମ୍ମାନ ସହ ପ୍ରତିଦିନ ଉଡ଼ାଇବାର ସୁଯୋଗକୁ ଉତ୍ସବ ଭଳି ପାଳନ କରାଯାଇଛି । ୨୦୦୪ ମସିହା ପୂର୍ବରୁ ଭାରତୀୟମାନଙ୍କୁ ପ୍ରତିଦିନ ତ୍ରିରଙ୍ଗା ପତାକା ଉଡ଼ାଇବାର ଅଧିକାର ନଥିଲା । କିନ୍ତୁ ଭାରତବାସୀକୁ ଏହି ଅଧିକାର ପ୍ରଦାନ କରିବା ପାଇଁ ଶ୍ରୀ ନବୀନ ଜିନ୍ଦଲ ଦୀର୍ଘ ୧୦ ବର୍ଷ ଧରି ସଂଘର୍ଷ ଜାରି ରଖିବା ସହ ଉଭୟ ଦିଲ୍ଲୀ ହାଇକୋର୍ଟ ଓ ସୁପ୍ରିମକୋର୍ଟରେ ଏଥି ନିମନ୍ତେ ମାମଲା ଲଢ଼ିଥିଲେ । ଯାହାର ଫଳ ସ୍ୱରୂପ ଆଜି ଆମେ ପ୍ରତିଦିନ ତ୍ରିରଙ୍ଗା ପତାକା ସମ୍ମାନର ସହ ଉଡ଼ାଇବାର ସୁବର୍ଣ୍ଣ ସୁଯୋଗ ପାଇଛୁ । ସେହିପରି ଏହା ମୌଳିକ ଅଧିକାର ଭାବେ ସ୍ୱୀକୃତି ପାଇଛି । ସୁପ୍ରିମକୋର୍ଟଙ୍କ ଏହି ରାୟ ପ୍ରମାଣିତ କରିଦେଇଛି ଯେ, ତ୍ରିରଙ୍ଗା ହେଉଛି ରାଷ୍ଟ୍ରପ୍ରତି ଆନୁଗତ୍ୟ ତଥା ଗର୍ବ ଓ ଗୌରବର ପ୍ରତୀକ ।
ଶ୍ରୀ ନବୀନ ଜିନ୍ଦଲଙ୍କ ଦ୍ୱାରା ଗଠନ ହୋଇଥିବା ଫ୍ଲାଗ୍ ଫାଉଣ୍ଡେସନ ଅଫ୍ ଇଣ୍ଡିଆ ଏବଂ ଜିନ୍ଦଲ ଫାଉଣ୍ଡେସନର ଅଧ୍ୟକ୍ଷା ଶ୍ରୀମତି ଶାଲୁ ଜିନ୍ଦଲ, ଜାତୀୟ ପତାକାର ମହତ୍ମର ପ୍ରସାର ଦିଗରେ ବେଶ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ଆଲୋଚନା, ପୁସ୍ତକ ପ୍ରକାଶନ, ତ୍ରିରଙ୍ଗା ପତାକା ସ୍ମାରକୀ ସ୍ଥାପନ ସମେତ ତ୍ରିରଙ୍ଗା ଦୌଡ଼ ଭଳି ଦେଶାତ୍ମବୋଧ କାର୍ଯ୍ୟକ୍ରମ ଆୟୋଜନ କରି ଏହି ଅଭିଯାନକୁ ଆଗେଇ ନେଇଛନ୍ତି । ବର୍ତ୍ତମାନ ପର୍ଯ୍ୟନ୍ତ ସାରା ଦେଶରେ ୧୬୩ଟି ସ୍ମାରକୀ ତ୍ରିରଙ୍ଗା ପତାକା ସ୍ତମ୍ଭ ସ୍ଥାପନ କରାଯାଇଥିବା ବେଳେ ଏଥିରେ ଓଡ଼ିଶାର ୮ଟି ସ୍ଥାନ ଅର୍ନ୍ତଭୁକ୍ତ ରହିଛି ।
ଏହି ଅବସରରେ ଜିନ୍ଦଲ ନଗର ଠାରେ ଥିବା ୨୦୭ ଫୁଟ ବିଶିଷ୍ଟ ସ୍ମାରକୀ ଫ୍ଲାଗ୍ ପୋଲରେ ଜେଏସପି ଅନୁଗୁଳ ମୁଖ୍ୟ ତଥା କାର୍ଯ୍ୟନିର୍ବାହୀ ନିର୍ଦ୍ଦେଶକ ଶ୍ରୀ ପଙ୍କଜ ମଲହାନଙ୍କ ନେୃତ୍ୱତ୍ୱରେ ପତାକା ଉତ୍ତୋଜନ କରାଯାଇଥିଲା । କାର୍ଯ୍ୟନିର୍ବାହୀ ନିର୍ଦ୍ଦେଶକ (ପ୍ରକଳ୍ପ) ଶ୍ରୀ ଦାମୋଦର ମିତ୍ତଲ ଏବଂ ସମସ୍ତ ବିଭାଗର ବିଭାଗୀୟ ମୁଖ୍ୟମାନେ ମଧ୍ୟ ଉପସ୍ଥିତ ଥିଲେ । ଏଥିରେ ଜେଏସପିର କର୍ମଚାରୀ ଏବଂ ସ୍କୁଲ ଛାତ୍ରଛାତ୍ରୀମାନେ ଏକତ୍ରିତ ହୋଇ ଜାତୀୟ ପତାକାକୁ ସମ୍ମାନ ଜଣାଇଥିଲେ ।
କର୍ମଚାରୀମାନଙ୍କୁ ପ୍ରେରଣା ଦେବା ପାଇଁ ସମସ୍ତ ବିଭାଗର ସମ୍ମିଳନୀ କକ୍ଷରେ ତ୍ରିରଙ୍ଗା ପତାକାର ଯାତ୍ରା ଏବଂ ଏହାର ମହତ୍ୱକୁ ପ୍ରତିଫଳିତ କରୁଥିବା ୧୫ ମିନିଟର ଏକ ଭିଡିଓ ପ୍ରଦର୍ଶନ କରାଯିବା ସହ ଏକ ଅନଲାଇନ କୁଇଜ୍ ପ୍ରତିଯୋଗିତାର ମଧ୍ୟ ଆୟୋଜନ କରାଯାଇଥିଲା । ଯାହାର ପ୍ରଥମ ତିନି ଜଣ ବିଜେତାଙ୍କୁ ଆକର୍ଷଣୀୟ ଉପହାର ପ୍ରଦାନ କରାଯାଇଥିଲା । ଏକ ବାଧ୍ୟତାମୂଳକ ହସ୍ତାକ୍ଷର ଅଭିଯାନ ଜରିଆରେ ଆଜିର ଦିନଟିକୁ ସ୍ମରଣୀୟ କରିବା ପାଇଁ ଉଦ୍ୟମ କରାଯାଇଥିଲା ।
ଏହି ଅବସରରେ ଶ୍ରୀ ନବୀନ ଜିନ୍ଦଲ ନୂଆଦିଲ୍ଲୀର କନ୍ନଟ୍ ପ୍ଲେସଠାରେ ଏକ ସ୍ୱତନ୍ତ୍ର ପ୍ରଦଶର୍ନୀର ଉଦଘାଟନ କରିଥିଲେ । ଏହି ପ୍ରଦର୍ଶନୀରେ ବିଜୟ ଏସ. ଯୋଧାଙ୍କ ସଂଗୃହୀତ ତ୍ରିରଙ୍ଗା ପତକାର ବିରଳ କୃତିତ୍ୱ ସ୍ଥାନ ପାଇଥିଲା, ଯାହା ଲିମକା ବୁକ ଅଫ ରେକର୍ଡସରେ ସ୍ଥାନ ପାଇଛି ।
ଏହି ଅବସରରେ ଶ୍ରୀ ନବୀନ ଜିନ୍ଦଲ ପ୍ରତ୍ୟେକ ନାଗରିକଙ୍କୁ “ହର ଘର ତ୍ରିରଙ୍ଗା-ହର ଦିନ ତ୍ରିରଙ୍ଗା” ନୀତିକୁ ଗ୍ରହଣ କରିବା ପାଇଁ ଅନୁରୋଧ କରିଥିଲେ ଏବଂ ଏହି ତ୍ରିରଙ୍ଗା ରାଷ୍ଟ୍ର ନିର୍ମାଣ ପାଇଁ ସାମୂହିକ ସମର୍ପଣ ଭାବ ପାଇଁ ପ୍ରେରଣା ଦେଉ ବୋଲି କାମନା କରିଥିଲେ ।
ଏହି କାର୍ଯ୍ୟକ୍ରମ ନୂଆ ଉତ୍ସାହ ଓ ଗୌରବର ଭାବ ସହ ଶେଷ ହୋଇଥିଲା । କର୍ମଚାରୀମାନେ ତ୍ରିରଙ୍ଗା ଦ୍ୱାରା ଅନୁପ୍ରାଣିତ ମୁଲ୍ୟବୋଧକୁ ବଜାୟ ରଖିବାକୁ ପ୍ରତିଶ୍ରୁତି ଦେଇଥିଲେ, ଯାହା ବିବିଧତା ଭିତରେ ଏକାତାର ବାର୍ତ୍ତା ଦେଉଥିଲା ।