Angul News: ନବବର୍ଷ ପାଳନ ଅବସରରେ ବ୍ରହ୍ମା କୁମାରୀ ଆଶ୍ରମରେ ସ୍ନେହ ମିଳନ କାର୍ଯ୍ୟକ୍ରମ

Angul News(ସୁବ୍ରତ ପଟ୍ଟନାୟକ): ନବ ବର୍ଷ ୨୦୨୩ କୁ ସ୍ଵାଗତ କରି ପ୍ରଜାପିତା ବ୍ରହ୍ମା କୁମାରୀ ଈଶ୍ୱରୀୟ ବିଶ୍ଵ ବିଦ୍ୟାଳୟ, ଅନୁଗୋଳ ପରିସରରେ ଏକ ସ୍ନେହ ମିଳନ ଅନୁଷ୍ଠିତ ହୋଇଥିଲା। ଏଥିରେ ପୌରୋହିତ୍ୟ କରି ବ୍ରହ୍ମାକୁମାରୀ ମିନତୀ ଭଉଣୀ କହିଲେ ଯେ, ସମାଜର ସେବା କରିବାର ଲକ୍ଷ୍ୟ ନେଇ ବାହାରିଥିବା ସେବାଧାରୀ ଠାରେ ସେବକ ଭାବର ଲକ୍ଷଣ ପରିଦୃଷ୍ଟ ନହେବା ପଛରେ ଯେଉଁ ମୁଖ୍ୟ କାରଣଟି ରହିଛି ତାହା ହେଉଛି ଅହଙ୍କାର । ମୁଁ ଯାହା କହୁଛି ତାହାହିଁ ଠିକ୍, ମୁଁ ନ ରହିଲେ କିଛି କାମ ହେବନାହିଁ.. ଇତ୍ୟାଦି ମୁଁ ଭାବ ଦେହ ଅଭିମାନର ଚିହ୍ନ ଅଟେ। ଏହା ପବିତ୍ରଭାବେ ସେବା କରିବାକୁ ଦିଏ ନାହିଁ। ଏଣୁ ବିଶ୍ଵ କଲ୍ୟାଣ ସେବା କରିବା ପାଇଁ ନିମିତ୍ତ ବା ବିନମ୍ରତା ପୋଷଣ କରିବା ଆବଶ୍ୟକ।
ମୁଖ୍ୟ ଅତିଥି ରୂପେ ବିଶିଷ୍ଟ ସମାଜସେବୀ ତଥା ପୂର୍ବତନ ଟା ମ ଡା ଅଧ୍ୟକ୍ଷ ଶ୍ରୀଯୁକ୍ତ ଶକ୍ତି ପ୍ରସାଦ ପଟ୍ଟନାୟକ ଯୋଗଦେଇ କହିଥିଲେ ଯେ ଅହଙ୍କାର ତ୍ୟାଗ କରି ମାଆ ମାଟି ପାଇଁ ସମସ୍ତ ଅନୁଷ୍ଠାନମାନେ କାର୍ଯ୍ୟ କଲେ ସଂସାର ଅବଶ୍ୟ ସୁନ୍ଦର ହୋଇଯିବ। ସ୍ଥାନୀୟ ୧୪ ନମ୍ବର ୱାର୍ଡର କାଉନସେଲର ଭଗ୍ନୀ ଶ୍ରୀମତୀ ସୁଲୋଚନା ଦ୍ବିବେଦୀ ଯୋଗ ଦେଇ ସମସ୍ତଙ୍କୁ ଶାନ୍ତି, ସୁଖ ଓ ସମୃଦ୍ଧି ପ୍ରାପ୍ତିର ଶୁଭେଚ୍ଛା ରଖିଥିଲେ। ପତାଞ୍ଜଳି ଯୋଗ ଗୁରୁ ଶ୍ରୀଯୁକ୍ତ ଅଭୟ ରାୟ ନୂତନ ବର୍ଷ ସାରା ହସି ଖୁସି ବିତାଇବା ପାଇଁ ଶୁଭେଚ୍ଛା ଦେଇଥିଲେ। ବିଶିଷ୍ଟ ଆନ୍ତର୍ଜାତିକ ଖ୍ୟାତି ସଂପନ୍ନ ଖେଳାଳି ଶ୍ରୀଯୁକ୍ତ ପ୍ରକାଶ କୁମାର ଗଡ଼ନାୟକଙ୍କୁ ସମ୍ମାନିତ କରାଯାଇଥିଲା । ସେ କହିଥିଲେ ଯେ ଚବିଶ ଘଣ୍ଟାରୁ ଦୈନିକ ଗୋଟିଏ ଘଣ୍ଟା ନିଜ ଦେହର ଯତ୍ନ ନେବା ପାଇଁ ବ୍ୟାୟାମ ଇତ୍ୟାଦି କରିବା ଆବଶ୍ୟକ ଅଟେ।
ବହୁ ଖ୍ୟାତସମ୍ପନ୍ନ ଓଡ଼ିଆ ଚଳଚ୍ଚିତ୍ର “ପ୍ରତୀକ୍ଷା ” ର ଅଭିନେତ୍ରୀ ଭଗ୍ନୀ ରୂପାମ୍ବିକା ନାୟକ ତଥା କେନ୍ଦ୍ରୀୟ ବିଦ୍ୟାଳୟରେ ଷ୍ଟାଣ୍ଡାର୍ଡ- ୨ ପଢୁଥିବା ଶିଶୁ କଣ୍ଠଶିଳ୍ପୀ ତେଜସ୍ଵିନୀ ସାହୁଙ୍କୁ ମଧ୍ୟ ଅନୁଷ୍ଠାନ ପକ୍ଷରୁ ସମ୍ମାନିତ କରା ଯାଇଥିଲା।
ମୁରଲୀ ପଠନ, ବିଶ୍ଵଶାନ୍ତି ପାଇଁ ସହଜ ରାଜଯୋଗ ତଥା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଦ୍ବାରା ନବ ବର୍ଷକୁ ସ୍ବାଗତ କରାଯାଇଥିଲା। ଏଥିରେ ଅନୁଗୋଳ ଜିଲ୍ଲାର ବିଭିନ୍ନ ସ୍ଥାନରୁ ବହୁ ସଂଖ୍ୟାରେ ଭାଇ ଭଉଣୀ ମାନେ ସମବେତ ହୋଇଥିଲେ। କାର୍ଯ୍ୟକ୍ରମ ସଂଯୋଜନା କରିଥିଲେ ସୁଦର୍ଶନ ଭାଇ।