Angul News: ଅନୁଗୋଳ: ଅନୁଗୋଳ ସହର ଉପକଣ୍ଠ ଅଙ୍ଗାରବନ୍ଧ ଠାରେ ହେବାକୁ ଥିବା ମାଘ ମେଳା ଓ ମହିମା ଆନ୍ତର୍ଜାତୀୟ ମହୋତ୍ସବ ପାଳନ ନିମନ୍ତେ ଏକ ପ୍ରସ୍ତୁତି ବୈଠକ ଅନୁଗୋଳ ର ଉପଜିଲ୍ଲାପାଳ ମାୟାଧର ବେହେରା ଙ୍କ ଅଧକ୍ଷତାରେ ଉପଜିଲ୍ଲାପାଳଙ୍କ ସମ୍ମିଳନୀ କକ୍ଷ ଠାରେ ଅନୁଷ୍ଠିତ ହୋଇଯାଇଛି। ମାଘ ମେଳା ଓ ମହୋତ୍ସବ କୁ କିପରି ସଫଳ କରାଯିବ ସେଥି ନିମନ୍ତେ ବିଭିନ୍ନ ସରକାରୀ ସଂସ୍ଥା ଓ ମହିମା ଧାମ ପରିଚାଳନା କମିଟି ର ସାହାଯ୍ୟ ଓ ସହଯୋଗ କରିବା ନିମନ୍ତେ ଏହି ବୈଠକ ର ଆୟୋଜନ କରାଯାଇଥିଲା।
ଏହି ବୈଠକ ରେ ସ୍ୱାସ୍ଥ୍ୟ ସେବା, ପାନୀୟ ଜଳ ଯୋଗାଣ ବ୍ୟବସ୍ଥା, ବିଦ୍ୟୁତ ସେବା, ପରିମଳ ବ୍ୟବସ୍ଥା, ଅଗ୍ନି ନିରୋଧକ ବ୍ୟବସ୍ଥା, ରାସ୍ତା ମରାମତି, ଆଇନ ଶୃଙ୍ଖଳା ବ୍ୟବସ୍ଥା ଓ ସାଂସ୍କୃତିକ କାର୍ଯ୍ୟକ୍ରମ ବ୍ୟବସ୍ଥା ଉପରେ ଆଲୋଚନା ହୋଇଥିଲା। ବୈଠକ ରେ ଅଧକ୍ଷତା କରୁଥିବା ଶ୍ରୀ ବେହେରା ମହୋତ୍ସବ ପାଇଁ ନିଜର ଏକ ଜେନେରେଟର କିଣିବା ଓ ମହୋତ୍ସବ କୁ ପୋଲିସ କୁ ସହାୟତା କରିବା ପାଇଁ ଗ୍ରାମ ପଞ୍ଚାୟତ ରୁ ପ୍ରାୟ ୫୦ଜଣ ସ୍ବେଛାସେବୀ ନିୟୋଜିତ କରିବାକୁ ପରାମର୍ଶ ଦେଇଥିଲେ। ମେଳା ପୂର୍ବରୁ ଉପଜିଲ୍ଲାପାଳ ଙ୍କ ନେତୃତ୍ୱ ରେ ଏକ କମିଟି ମେଳା ତଥା ମହୋତ୍ସବ ର କାର୍ଯ୍ୟକାରିତା ସମ୍ପର୍କ ରେ ତଦାରଖ କରିବା ସହିତ ଘଟଣା ସ୍ଥଳକୁ ପରିଦର୍ଶନ ରେ ଯିବେ ବୋଲି ବୈଠକରେ ପ୍ରକାଶ କରିଥିଲେ।
ଏହି ବୈଠକରେ ଅନୁଗୋଳ ତହସିଲଦାର ଆଲୋକ ଦେହୁରୀ, ଅନୁଗୋଳ ବିଡିଓ ବିଶ୍ଵ ଭୂଷଣ, ଡେପୁଟି କଲେକଟର ସ୍ୱାହା ମହାନ୍ତି, ସଦର ଥାନା ଅଧିକାରୀ ମୁର୍ଣ୍ଣାଲ କାଲୋ, ଗ୍ରାମ୍ୟ ନିର୍ମାଣ ବିଭାଗର ସହ ଯନ୍ତ୍ରୀ ପ୍ରଫୁଲ୍ଲ କୁମାର ଭୋଇ, ଜିଲ୍ଲା ସାଂସ୍କୃତିକ ଅଧିକାରୀ ଙ୍କ ପ୍ରତିନିଧି ସଚିନ ଜ୍ୟୋତିରାଦିତ୍ୟ, ଉପଜିଲ୍ଲାପାଳ ଙ୍କ କାର୍ଯ୍ୟାଳୟ ର ବରିଷ୍ଠ କିରାଣୀ ରାଜେନ୍ଦ୍ର ସାହୁ, ଟାଟା ପୱାର ର ନିର୍ବାହୀ ଯନ୍ତ୍ରୀ ମାନସ କର, ଅଙ୍ଗାରବନ୍ଧର ସରପଞ୍ଚ ସୁଜାତା ସାହୁ, ସମିତି ସଭ୍ୟଙ୍କ ପ୍ରତିନିଧି ଗିରିଶ ଚନ୍ଦ୍ର ସ୍ୱାଇଁ, ଅଲେଖ ମହିମା ଧାମ ପରିଚାଳନା କମିଟି ର ସଭାପତି ଲୋକନାଥ ସାହୁ ଓ ଶିବ ସାହୁ, ସାଧାରଣ ସମ୍ପାଦକ କୃଷ୍ଣ ଚନ୍ଦ୍ର ସାହୁ, କୋଷାଧକ୍ଷ ବିଜ୍ଞାନୀ ବେହେରା, ସୁଧୀର ବେହେରା, ସଦସ୍ୟ ପରେଶ ଚନ୍ଦ୍ର ଜେନା, ବିକନ ସାହୁ, କରୁଣା କର ସାହୁ ଓ ଆଇନ ପରାମର୍ଶଦାତା ଦ୍ୱାରିକା ପ୍ରସାଦ ନନ୍ଦ ପ୍ରମୁଖ ଉପସ୍ଥିତ ଥିଲେ।
ଉଲେଖଯୋଗ୍ୟ ଯେ ମହିମା ମାଘ ମେଳା ଓ ମହୋତ୍ସବ ଅଙ୍ଗାରବନ୍ଧ ଗ୍ରାମ ଠାରେ ଚଳିତ ବର୍ଷ ଫେବୃଆରୀ ମାସ ୧୦ ରୁ ୧୪ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ, ତିନିଦିନ ପର୍ଯ୍ୟନ୍ତ ମାଘ ମେଳା ଓ ମହୋତ୍ସବ ରେ ରାଜ୍ୟ ଜାତୀୟ ଓ ଆନ୍ତର୍ଜାତୀୟ ସ୍ତରର କଳାକାର ମାନେ ପ୍ରତିବର୍ଷ ପରି ଏହି ବର୍ଷ ମଧ୍ୟ ସାଂସ୍କୃତିକ କାର୍ଯ୍ୟକ୍ରମ ରେ ଯୋଗଦେବେ।ଏହି ମେଳା ଓ ମହୋତ୍ସବ ରେ ପ୍ରତିବର୍ଷ ପରି ମଧ୍ୟ ଲକ୍ଷାଧିକ ଭକ୍ତ ଯୋଗଦେବେ।