Angul News: ଅନୁଗୁଳ: ଜିନ୍ଦଲ ଷ୍ଟିଲ ଆଣ୍ଡ ପାୱାର (ଜେଏସପି) ପକ୍ଷରୁ ଜିନ୍ଦଲ ନଗରରେ ଥିବା ନବନିର୍ମିତ କ୍ରୀଡ଼ା କମ୍ପ୍ଲେକ୍ସଠାରେ ୭୬ତମ ଗଣତନ୍ତ୍ର ଦିବସ ପାଳିତ ହୋଇଛି । ଜେଏସପି ଅଧ୍ୟକ୍ଷ ତଥା ହରିୟାଣାର କୁରୁକ୍ଷେତ୍ରରୁ ୩ଥର ନିର୍ବାଚିତ ସାଂସଦ ଶ୍ରୀ ନବୀନ ଜିନ୍ଦଲ ପତାକା ଉତ୍ତୋଳନ କରିଥିଲେ । ଜେଏସପି ଅନୁଗୁଳ ମୁଖ୍ୟ ତଥା କାର୍ଯ୍ୟନିର୍ବାହୀ ନିର୍ଦ୍ଦେଶକ ଶ୍ରୀ ପଙ୍କଜ ମଲହାନ, କାର୍ଯ୍ୟନିର୍ବାହୀ ନିର୍ଦ୍ଦେଶକ (ପ୍ରକଳ୍ପ) ଶ୍ରୀ ଦାମୋଦର ମିତ୍ତଲ, କମ୍ପାନୀର ଅନ୍ୟାନ୍ୟ ବରିଷ୍ଠ ଅଧିକାରୀ ଏବଂ ସଂପ୍ରଦାୟର ସଦସ୍ୟମାନେ ଏହି ଅବସରରେ ଉପସ୍ଥିତ ଥିଲେ ।
ପତାକା ଉତ୍ତୋଜନ ଏବଂ ଜାତୀୟ ସଂଗୀତ ଗାନ ପରେ ପରେ ଶ୍ରୀ ନବୀନ ଜିନ୍ଦଲ ଅଭିବାଦନ ଗ୍ରହଣ କରିବା ସହ ଉପସ୍ଥିତ ଜନତାଙ୍କୁ ସମ୍ବୋଧନ କରିଥିଲେ । ସେ ସମସ୍ତଙ୍କୁ ଗଣତନ୍ତ୍ର ଦିବସର ଶୁଭେଚ୍ଛା ଜଣାଇଥିବା ସହିତ ସମ୍ବିଧାନ କାର୍ଯ୍ୟକାରୀ ହେବା ପରଠାରୁ ୭୫ ବର୍ଷ ଧରି ଏହାର ମର୍ଯ୍ୟାଦାକୁ ବଜାୟ ରଖି ଆସିଥିବାରୁ ନାଗରିକମାନଙ୍କୁ ଅଭିନନ୍ଦନ ଜଣାଇଥିଲେ ।
ଶ୍ରୀ ଜିନ୍ଦଲ ତାଙ୍କ ଅଭିଭାଷଣରେ ବ୍ୟକ୍ତିଗତ ଶୃଙ୍ଖଳା ଏବଂ ଦାୟିତ୍ୱ ଉପରେ ଗୁରୁତ୍ୱ ଦେଇଥିଲେ । ସେ ସମସ୍ତଙ୍କୁ ନିଜର ସ୍ୱାସ୍ଥ୍ୟ ଏବଂ ପରିବେଶକୁ ପ୍ରାଥମିକତା ଦେବାକୁ ଆହ୍ୱାନ ଦେବା ସହ କହିଥିଲେ,- ଶୃଙ୍ଖଳା ନିଜଠାରୁ ଆରମ୍ଭ ହୁଏ । ଯଦି ଆମେ ଆମର ସ୍ୱାସ୍ଥ୍ୟ ଏବଂ ପରିବେଶର ଯତ୍ନ ନନେବା, ତେବେ ଆମେ କିଭଳି ଦାୟିତ୍ୱବାନ ନାଗରିକ ହେବା ଏବଂ ଆମ ଦେଶର ପ୍ରଗତିରେ ଯୋଗଦାନ ଦେବାକୁ ଆଶା କରିବା । ଏହି ଅବସରରେ ସେ, ଦେଶକୁ ଗର୍ବିତ କରିବା ପାଇଁ ଅକ୍ଲାନ୍ତ ସମର୍ପଣ ଏବଂ ପ୍ରୟାସ କରିଥିବା ଦେଶର ଶିକ୍ଷକ, ସଶସ୍ତ୍ର ବାହିନୀ ଏବଂ ସୁରକ୍ଷା କର୍ମୀଙ୍କୁ କୃତଜ୍ଞତା ଜଣାଇଥିଲେ ।
ଜେଏସପିର ସ୍ଥାୟୀତ୍ୱ ପ୍ରତି ପ୍ରତିବଦ୍ଧତା ଉପରେ ଆଲୋକପାତ କରି ଶ୍ରୀ ଜିନ୍ଦଲ ସବୁଜ ଇସ୍ପାତ ଉତ୍ପାଦନରେ କମ୍ପାନୀର ଗୁରୁତ୍ୱ ଏବଂ ୨୦୪୭ ସୁଦ୍ଧା ‘ନେଟ-ଶୂନ୍ୟ ନିର୍ଗମନ’ ହାସଲ କରିବା ଲକ୍ଷ୍ୟ ବିଷୟରେ କହିଥିଲେ । ଏହି ଅବସରରେ ଓ.ପି. ଜିନ୍ଦଲ ସ୍କୁଲ ଏବଂ ଡିଏଭି-ସାବିତ୍ରୀ ଜିନ୍ଦଲ ସ୍କୁଲର ଛାତ୍ରଛାତ୍ରୀମାନେ ଦେଶାତ୍ମବୋଧକ ସଂସ୍କୃତିକ କାର୍ଯ୍ୟକ୍ରମ ପରିବେଶଣ କରିଥିଲେ, ଯାହା ଉପସ୍ଥିତ ଦର୍ଶକଙ୍କୁ ମୁଗ୍ଧ କରିଦେଇଥିଲା ।
ଏହି କାର୍ଯ୍ୟକ୍ରମରେ ଶ୍ରୀ ପଙ୍କଜ ମଲହାନ ଧନ୍ୟବାଦ ଅର୍ପଣ କରିଥିଲେ । ହରିୟାଣାର କୁରୁକ୍ଷେତ୍ରରୁ ଆସି ଗଣତନ୍ତ୍ର ଦିବସ ପାଳନ ଉତ୍ସବରେ ଯୋଗଦାନ କରିଥିବାରୁ ଶ୍ରୀ ନବୀନ ଜିନ୍ଦଲଙ୍କୁ ସେ ଧନ୍ୟବାଦ ଜଣାଇଥିଲେ । ସେ କହିଥିଲେ, ଏହା ଜେଏସପିର ନବନିର୍ମିତ ଷ୍ଟାଡିୟମରେ ଆୟୋଜିତ ପ୍ରଥମ କାର୍ଯ୍ୟକ୍ରମ । ଖୁବ ଶ୍ରୀଘ୍ର ଆଗାମୀ ଦିନରେ ଏଠାରେ ବିଭିନ୍ନ କ୍ରୀଡ଼ା ପ୍ରତିଯୋଗିତା ଆୟୋଜିତ ହେବ । ସେହିପରି ଚଳିତବର୍ଷର ବିଷୟବସ୍ତୁ “ସ୍ୱାଭିମାନ ଭାରତ- ଐତିହ୍ୟ ଏବଂ ବିକାଶ” ଉପରେ ଆଲୋକପାତ କରି ଦେଶର ପ୍ରଗତିରେ ଜେଏସପିର ପ୍ରତିବଦ୍ଧତାକୁ ସେ ଦୋହରାଇଥିଲେ ।
ଏହି କାର୍ଯ୍ୟକ୍ରମ ବ୍ୟତୀତ ଓ.ପି ଜିନ୍ଦଲ ସ୍କୁଲ, ଉକ୍ରଳ-ସି ମାଇନ୍ସ, ଶ୍ରୀଧାମ ପାୱାର ପ୍ଲାଂଟ, ଡିଏଭି-ସାବିତ୍ରୀ ଜିନ୍ଦଲ ସ୍କୁଲ ଏବଂ ଓ.ପି ଜିନ୍ଦଲ କମୁ୍ୟନିଟି କଲେଜ ଆଦି ସ୍ଥାନରେ ଗଣତନ୍ତ୍ର ଦିବସ ପାଳନ କରାଯାଇ୍ଥିଲା । ଯେଉଁଥିରେ ଛାତ୍ରଛାତ୍ରୀ, କର୍ମଚାରୀ ଏବଂ ସ୍ଥାନୀୟ ଗ୍ରାମବାସୀମାନେ ଯୋଗଦେଇ ଦେଶଭକ୍ତି ଓ ଦେଶପ୍ରେମ ଭାବନା ପ୍ରଦର୍ଶନ କରିଥିଲେ ।