Angul News: ଅନୁଗୋଳ: ନବଜାଗରଣର ଅନ୍ୟତମ ପୁରୋଧା କଥା ସମ୍ରାଟ ବ୍ୟାସକବି ଫକୀର ମୋହନ ସେନାପତିଙ୍କ ୧୮୩ତମ ଜୟନ୍ତୀ ଉପଲକ୍ଷେ ଏଆଇଡିଏସ୍ଓ ଅନୁଗୁଳ ଜିଲ୍ଲା କମିଟି ଉଦ୍ୟୋଗରେ ସହର ମଧ୍ୟସ୍ଥ ସାନ୍ଧ୍ୟ ଉଚ୍ଚ ମାଧ୍ୟମିକ ବିଦ୍ୟାଳୟ ଠାରେ ବିଭିନ୍ନ ପ୍ରତିଯୋଗିତା ସଂଗଠିତ ହେବାସହ ଆଲୋଚନା ସଭା ଅନୁଷ୍ଠିତ ହୋଇଯାଇଛି । ପୂର୍ବାହ୍ନରେ ସର୍ବପ୍ରଥମେ ଫକୀରମୋହନ ସେନାପତିଙ୍କ ଫଟୋଚିତ୍ରରେ ମାଲ୍ୟାର୍ପଣ କରିବା ପରେ ବିଭିନ୍ନ ଶିକ୍ଷାନୁଷ୍ଠାନରୁ ଆସିଥିବା ଛାତ୍ରଛାତ୍ରୀଙ୍କ ମଧ୍ୟରେ ବକ୍ତୃତା, ସାଧାରଣଜ୍ଞାନ, ଚିତ୍ରାଙ୍କନ, ସଙ୍ଗୀତ ଆଦି ପ୍ରତିଯୋଗିତା ଅନୁଷ୍ଠିତ ହୋଇଥିଲା । ସଂଗଠନର ଜିଲ୍ଲା ସଭାପତି ପରମାନନ୍ଦ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ ସାନ୍ଧ୍ୟ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ପ୍ରଶାନ୍ତ କୁମାର ମାଝୀ ବକ୍ତବ୍ୟ ମାଧ୍ୟମରେ ଫକୀରମୋହନଙ୍କ କାଳଜୟୀ ସାହିତ୍ୟକୃତୀ ଉପରେ ଆଲୋକପାତ କରିବା ସହିତ ସମାରୋହରେ ବହୁ ସଂଖ୍ୟାରେ ସ୍କୁଲ, କଲେଜର ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିବାରୁ ଭୂୟସୀ ପ୍ରଶଂସା କରିଥିଲେ । ମୁଖ୍ୟବକ୍ତାଭାବେ ଏଆଇଡିଏସ୍ଓ ରାଜ୍ୟ ସମ୍ପାଦକ ସିଦ୍ଧାର୍ଥ ରଥ ଏବଂ ଅନ୍ୟତମ ବକ୍ତାଭାବେ ବଲାଙ୍ଗୀର ଜିଲ୍ଲା ସଭାପତି ମଧୁସୂଦନ ବାଗ ଫକୀରମୋହନଙ୍କ ସାହିତ୍ୟ ମାଧ୍ୟମରେ ଦେଇଯାଇଥିବା ଶିକ୍ଷାକୁ ଭିତ୍ତିକରି ସମାଜ ପରିବର୍ତ୍ତନ ପଥରେ ଛାତ୍ରଛାତ୍ରୀମାନେ ଦାୟିତ୍ୱବାନ ହେବାକୁ କହିଥିଲେ । ଫକୀରମୋହନଙ୍କ ଗଳ୍ପ ଡାକମୁନସୀର ଗୋପାଳ ଭଳି ସ୍ୱାର୍ଥପର, ଆତ୍ମକୈନ୍ଦ୍ରୀକ ହେବେ ନା ରାଣ୍ଡିପୁଅ ଅନନ୍ତା ଗଳ୍ପର ଅନନ୍ତା ଭଳି ସାମାଜିକ ଦାୟିତ୍ୱବୋଧ ସମ୍ପନ୍ନ ମଣିଷ ହେବେ? ଏହି ପ୍ରଶ୍ନ ମାଧ୍ୟମରେ ସାମାଜିକ ଦାୟିତ୍ୱ ପାଳନ କରିବା ପଥରେ ମନୁଷ୍ୟତ୍ୱ ଅର୍ଜନ କରିବାକୁ ପଡିବ ବୋଲି ଆହ୍ୱାନ ଦେଇଥିଲେ । ଏହି ସଭାରେ ଅବସରପ୍ରାପ୍ତ ଅଧ୍ୟାପକ ପ୍ରହଲ୍ଲାଦ ବେହେରା, ଅଧ୍ୟାପକ ଧନେଶ୍ୱର ସାହୁ, ଅଧ୍ୟାପକ ପ୍ରଦୀପ କୁମାର ମାଝୀ ପ୍ରମୁଖ ଅତିଥି ଭାବରେ ଯୋଗଦେଇଥିଲେ । ଶେଷରେ କୃତୀ ପ୍ରତିଯୋଗୀମାନଙ୍କୁ ମାନପତ୍ର ସହ ପୁରସ୍କୃତ କରାଯିବା ପରେ ସଭା ଶେଷ ହୋଇଥିଲା । ଏଆଇଡିଏସ୍ଓ ଜିଲ୍ଲା ସମ୍ପାଦକ ନାରାୟଣ ନାୟକ ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ସଂଗଠିକା ସରୋଜିନୀ ବେହେରା, ନିରୂପମା ନାୟକ, ଏଲିସା ଶୁଭଦର୍ଶିନୀ, ଅନୁପମା ନାଏକ, ସୌମ୍ୟକାନ୍ତ ପ୍ରଧାନ, ବିଶ୍ୱରଞ୍ଜନ ପ୍ରକାଶ ପ୍ରମୁଖ କାର୍ଯ୍ୟକ୍ରମ ପରି·ଳନାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।
