Angul news ଅନୁଗୋଳ: ଅଲ୍ ଇଣ୍ଡିଆ ଇଲେକ୍ଟ୍ରିସିଟି କଂଜ୍ଯୁମର୍ସ ଆସୋସିଏସନ ( ଏଆଇଇସିଏ ) ଉଦ୍ୟୋଗରେ ୫ ମାର୍ଚ୍ଚ ୨୦୨୫ ବୁଧବାର ଦିନ ଦିଲ୍ଲୀର ଶାହା ଅଡିଟୋରିୟମରେ ବିଦ୍ୟୁତ୍ ଉପଭୋକ୍ତାଙ୍କ ଜାତୀୟ କନଭେନସନ ଅନୁଷ୍ଠିତ ହୋଇ ଯାଇଛି। ଆସୋସିଏସନର ସର୍ବ ଭାରତୀୟ ସଭାପତି ସ୍ବପନ ଘୋଷଙ୍କ ସଭାପତିତ୍ବରେ ଅନୁଷ୍ଠିତ ଏହି କନଭେନସନରେ ଉତ୍ତର ପ୍ରଦେଶ ପାଓ୍ବାର କର୍ପୋରେସନ ଲିମିଟେଡର ପୂର୍ବତନ ମୁଖ୍ଯ ଇଞ୍ଜିନିୟର ଓ ଅଲ୍ ଇଣ୍ଡିଆ ପାଓ୍ବାର ଇଞ୍ଜିନିୟର୍ସ ଫେଡେରେସନର ଅଧ୍ଯକ୍ଷ ଶୈଳେନ୍ଦ୍ର ଦୁବେ ମୁଖ୍ଯ ଅତିଥି ଭାବେ ଯୋଗ ଦେଇ କେନ୍ଦ୍ର ବିଜେପି ସରକାର ଓ ରାଜ୍ଯ ସରକାରମାନଙ୍କ ବିଦ୍ୟୁତ୍ କ୍ଷେତ୍ରର ଘରୋଇକରଣ ଓ ପ୍ରିପେଡ୍ ସ୍ମାର୍ଟ ମିଟର ପ୍ରଚଳନ ନୀତି ବିରୁଦ୍ଧରେ ବିଦ୍ୟୁତ୍ ଉପଭୋକ୍ତା ଏବଂ ବିଦ୍ୟୁତ୍ କର୍ମଚାରୀ ଓ ଇଞ୍ଜିନିୟର୍ସଙ୍କ ମିଳିତ ଆନ୍ଦୋଳନ ସଂଗଠିତ କରିବାକୁ ଆହ୍ବାନ ଦେଇଥିଲେ ।
ଏହି କନଭେନସନରେ ଭେଲ୍ ର ପୂର୍ବତନ ଉପ-ମହାପ୍ରବନ୍ଧକ ଓ ଅଲ୍ ଇଣ୍ଡିଆ ପାଓ୍ବାର ଇଞ୍ଜିନିୟର୍ସ ଫେଡେରେସନର ପାଟ୍ରୋନ୍ ଅଶୋକ ରାଓ , ଆସାମ ପାଓ୍ବାର ଡେଭେଲପମେଣ୍ଟ କର୍ପୋରେସନ ଲିମିଟେଡର ପୂର୍ବତନ ଉପ-ମହାପ୍ରବନ୍ଧ ବିମଳ ଦାସ , ପଶ୍ଚିମ ବଙ୍ଗ ରାଜ୍ଯର ଦାମୋଦର ଭାଲି କର୍ପୋରେସନର ପୂର୍ବତନ ମୁଖ୍ଯ ଇଞ୍ଜିନିୟର ଏ . କେ. ଜୈନ , ତାମିଲନାଡୁ ରାଜ୍ୟ ବିଦ୍ୟୁତ ବୋର୍ଡର ପୂର୍ବତନ ଇଞ୍ଜିନିୟର ଓ ତାମିଲନାଡୁ ପାଓ୍ବାର ଇଞ୍ଜିନିୟର୍ସ ସୋସାଇଟିର ସଭାପତି ଏସ୍. ଗାନ୍ଧୀ ସମ୍ମାନିତ ଅତିଥି ଭାବେ ଯୋଗ ଦେଇ ବିଦ୍ୟୁତ୍ ଉପଭୋକ୍ତା ,ବିଦ୍ୟୁତ୍ କର୍ମଚାରୀ ଓ ଇଞ୍ଜିନିୟର୍ସଙ୍କ ବିରୁଦ୍ଧରେ କେନ୍ଦ୍ରରେ ପୂର୍ବର କଂଗ୍ରେସ ସରକାର ଓ ବର୍ତ୍ତମାନର ବିଜେପି ସରକାର ଏବଂ ବିଭିନ୍ନ ରାଜ୍ଯ ସରକାରମାନେ ଗ୍ରହଣ କରିଥିବା ନୀତି ଓ ପଦକ୍ଷେପ ସମ୍ପର୍କରେ ବିଶଦଭାବେ ଉଲ୍ଲେଖ କରି ଦେଶବ୍ଯାପୀ ମିଳିତ ଆନ୍ଦୋଳନ ଗଢିତୋଳିବାକୁ ମତବ୍ୟକ୍ତ କରିଥିଲେ। ଆସୋସିଏସନର ସାଧାରଣ ସମ୍ପାଦକ କେ.ଭି. ଭଟ୍ଟ କନଭେନସନର ମୁଖ୍ଯ ପ୍ରସ୍ତାବ ଆଗତ କରିଥିଲେ ଏବଂ ବିଦ୍ୟୁତ୍ କ୍ଷେତ୍ରର ଘରୋଇକରଣ ବିରୁଦ୍ଧରେ ବିଦ୍ୟୁତ୍ କର୍ମଚାରୀ ଓ ଇଞ୍ଜିନିୟର୍ସଙ୍କ ଆନ୍ଦୋଳନକୁ ସମର୍ଥନ କରି ଏକ ସଂହତି ପ୍ରସ୍ତାବକୁ ଆସୋସିଏସନର ଅଫିସ୍ ସମ୍ପାଦକ ସୁବ୍ରତ ବିଶ୍ବାସ ଆଗତ କରିଥିଲେ । ଏହି ପ୍ରସ୍ତାବ ଦୁଇଟି ସର୍ବ ସମ୍ମତିରେ ଗୃହୀତ ହୋଇଥିଲା।
ଅନ୍ଯମାନଙ୍କ ମଧ୍ଯରେ ଆସୋସିଏସନର କାର୍ଯ୍ୟକାରୀ ସଭାପତି ସମର କୁମାର ସିଂହ, ଓଡିଶାର ଜୟସେନ ମେହେର , ପ୍ରହ୍ଲାଦ ଚନ୍ଦ୍ର ସାହୁ, କର୍ଣ୍ଣାଟକର କେ. ସୋମଶେଖର, ପଶ୍ଚିମବଙ୍ଗର ଅଜୟ ଚାଟ୍ଟାର୍ଜୀ,ଅନୁକୂଳ ଭଦ୍ର,ବିମଳ ଜାନା, ଆସାମର ଅଜୟ ଆଚାର୍ଜୀ, ଦିଲ୍ଲୀର ରମେଶ ପରାଶର, ମଧ୍ୟପ୍ରଦେଶର ରଚନା ଅଗ୍ରୱାଲା, ଉତ୍ତର ପ୍ରଦେଶର ବିଜୟ ପାଲ୍ ସିଂହ, ହରିୟାଣାର ମେହେର ସିଂ, ତାମିଲନାଡୁର ଆନାବର୍ଦ୍ଧନ, ପଡୁଚେରୀର ଶିବ କୁମାର ପ୍ରମୁଖ ମଧ ବକ୍ତବ୍ଯ ପ୍ରଦାନ କରିଥିଲେ। ପ୍ରିପେଡ୍ ସ୍ମାର୍ଟ ମିଟର, ବିଦ୍ୟୁତ୍ ଶୁଳ୍କ ବୃଦ୍ଧି ଓ ବିଦ୍ୟୁତ୍ କ୍ଷେତ୍ରର ଘରୋଇକରଣ ବିରୁଦ୍ଧରେ ୨୦୨୫ ମସିହା ଏପ୍ରିଲ ୧ରୁ ୭ ପର୍ଯ୍ୟନ୍ତ ଦେଶବ୍ଯାପୀ ପ୍ରତିବାଦ ସପ୍ତାହ, ଏପ୍ରିଲ ୧ ରୁ ୧୪ ପର୍ଯ୍ୟନ୍ତ ଦେଶବ୍ଯାପୀ ସ୍ବାକ୍ଷର ସଂଗ୍ରହ, ଜୁନ୍ ୧୬ ରୁ ୨୧ ପର୍ଯ୍ୟନ୍ତ ପ୍ରତ୍ୟେକ ରାଜ୍ଯର ରାଜ୍ଯପାଳଙ୍କ ମାଧ୍ୟମରେ କେନ୍ଦ୍ର ଶକ୍ତିମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ ଓ ମୁଖ୍ଯମନ୍ତ୍ରୀଙ୍କୁ ମଧ୍ଯ ସ୍ମାରକପତ୍ର ପ୍ରଦାନ ଆନ୍ଦୋଳନ ସଂଗଠିତ କରିବା ନିମନ୍ତେ ନିଷ୍ପତ୍ତି ଗ୍ରହଣ କରାଯାଇଛି। ବିଦ୍ୟୁତ୍ କ୍ଷେତ୍ରର ଘରୋଇକରଣ ଓ ପ୍ରିପେଡ୍ ସ୍ମାର୍ଟ ମିଟର ବିରୁଦ୍ଧରେ ୨୬ ଜୁନ୍ ୨୦୨୫ରେ ନେସନାଲ୍ କୋଅର୍ଡିନେସନ କମିଟି ଅଫ୍ ଇଲେକ୍ଟ୍ରିସିଟି ଏମ୍ପ୍ଲୋଇଜ୍ ଏଣ୍ଡ ଇଞ୍ଜିନିୟର୍ସ ଆହ୍ବାନରେ ହେବାକୁ ଥିବା ବିଦ୍ୟୁତ୍ କର୍ମଚାରୀ ଓ ଇଞ୍ଜିନିୟର୍ସଙ୍କ ଧର୍ମଘଟକୁ ସମସ୍ତ ଦିଗରୁ ସମର୍ଥନ କରିବା ପାଇଁ ମଧ୍ୟ ନିଷ୍ପତ୍ତି ହୋଇଛି।